Murdha sambrama
Om Swastiastu Om Awignamastu,
Sangkaning panganugran Ida sang hyang saraswati
Sida raris titiang ngardinin kitab malit puniki mangda sida raris midartayang parindikan atma mangdane sida raris kauningin ileh Ida dane para umat hindu parinidikan Atma sane embank sareng sami mangda sida sayan tekek tangkeng percaya ring hyang atma, sapunapi minab tur patut mretenin mangda sida rahayu tur pungkuran ngemangguhang kerahayuan,. Dawning sangkaning Atma taler meangga pahpahan Hyang Widhi mawinan janten sampun sida pacang sayan nampek ring Ida sang hyang parama wisesa, Dwaning rumasa titiang tuna makasami janten sampun nenten paripurna pekardin titiang, taler mangda sida ngewehin pewarah warah mangda sida anggen titi pengancan ripungkuran sida raris mangguh paripurana.Inggih kadi sapunika atur pamurwaning titiang dumugi sida wenten pikenohnyane ri sajeroning kauripan
Tur sineb antuk paramashanti, om shanti shanti shanti Om
Sang anurat
Sang ketut Dharmayasa BA.
PUPUH SINOM
- SAKING PURWA ATUR TITIANG
MENGATURANG PANGANJALI
MOGI SIDA KALEDANGAN
SAKING IDA SARASWATI
TEDUN NGICEN SUNAR SUCI
SARWA KAPTI SIDA PANGGUH
MIDARTAYANG SANG HYANG ATMA
SANE ABIH SATUNGGIL WAI
PAGEH KUKUH
MANINDIHIN KAWEKASAN
2 MUNGGAH MARING PANCA SRADH
BACAKANNYA KAPING KALIH
PATUT IRAGA PERCAYA
MANGDA SIDA KANUGRAHIN
PANJANGYUSA, JRONING URIP
YANING SAMPUN STATA GUGU
MANULUNGIN SARWA KARYA
MANGICENIN AMRETA SARI
LUNAS LANUS
NYAMA BRAYA PADA EGAR/
PUPUH GINADA.
- ATMANE JANI TUTURANG
MANYUSUPI SARWA PRANI
YANING MARING LELENTIKAN
EKA PREMANA YA KAWUWUS
YANING MANJING RING BEBURIN
KEWASTANIN
DWI PREMANANE IKA
- KALA MANJING RING MANUSA
TRIPREMANA IKA JATI
SABDA BAYU IDEP NGARAN
TUNGGIL DADI ATMA IKU
ONGKARANE LAMBANG IDA
MAHA SAKTI
DWANING LINGGAN HYANG WISESA.
- SANGKAL MELAH BEN NGAJINANG
APANG SIDA STATA KAKEMIT
NGARDI RAGA PANJANG YUSA
NE KEBAWOS HIDUP IKU
MEL;AHANG NYEN MAMIARA
APAN INJIL
EDA PESAN CENING GOYAH
RENG SRONCA
- HYANG ATMA MAHOTAMA
SAMA JUGA LAWAN HYANG WIDHI
APAN YEKI MAKA CARANGNIA
MAPA YA HYANG WISESA MANGKANA JUGA
- CADU SAKTI SIDA GINELAR
KRYA SAKTI, JANAN SAKTI MUAH
RAJA SAKTI LAWAN WIBHU SAKTI
MUAH SIDA JUGA KASTESWARYAN
- RIKALANING LEPAS SIRA HYANG ATMA
LEBAR , PEJAH , LEBUR SINANGGUH
MLECAT SIRA MANYUNIATA
MAHYUN ANGUNGSI HYANG PARAMA ATMA.
8 KUNANG BINA KALANIA UMANTUK
TAN SIDA SAMA LAWAN WONG LEN
AWANANIA JUGA MABINAYAN
MANUT MARING SEMAYAN NIA SOWANG .
9.MATANGYAN AYWA SOKA
YAN ANA SANAKTA PEJAH
APAN KAPUA MAMANGGUHA
DENING KALIPUTAN RWA BHINEDA
PUPUH GINANTI
10. RWABHINEDA NE TUHU
DWANING ENTO MAKA POKOK
KAMULAN SARWA MAURIP
JRONING AKSARA “ANG “ MWAH “AH”
ONGKARANE YANING TUNGGIL
11 MAKA LAMBANG YAYAH IBU
KEBAWOSANG LANANG ISTRI
YANING ENE SIDA TUNGGAL
MAHASAKTI NGARDI SAMI
CETANA MIWAH ACETANA
KALA NGARDI DAGING GUMI
12.NE KEBAWOS BWANA AGUNG
JAGAT RAYA NE TONGOSIN
MASIH MAWIT RWA BHINEDA
AKASANE LAWAN PRETIWI
AKASANE MERAGA “YAYAH”
IBYANG UGI MRAGA PRETIWI
13.MASIH ENTO KAL KAJUJUR
RIKALANING SUBA MATI
SANMGKAL PATUT YA KEPENDEM
RING PRETIWI MATUR PAMIT
DIPLEBONE YA KAGESENG
RING AKASA PACANG MEWALI
PUPUH PUCUNG
14.JRONING HIDUP
PATUT MATINGKAH NE PATUT
APANG NEMUANG SUKA
SUKA MARING JRONING URIP
PANGSING NGAPUNG
SABDA BAYU MUWAH IDEP
15.SARWA TUTUR
PATUT GUGU TURMANGRUNGU
ANGGON DASAR MATINGKAH
PANG SING TEPUK ANE SUKIL
YAN SUBA NGUGU
ASING ALIH MENADI ELAH
16.SALING TULUNG
TRESNA ASIHE PANG TUHU
EDA PATI CEDA
APA BUIN IRI HATI
WALUYA RACUN
NGARDI NRAKA RING KORIPAN
17.CENING BAGUS
JANI BAPA PACANG NUTUR
INDIK SANG HYANG ATMA
DISUBANE MADAN MATI
ENU HIDUP
NANGING TONGOSNYA MABINA
PUPUH DURMA
18.RIKALANING LEPAS IDA HYANG ATMA
LEBAR LEBUR, SEDA MATI
KETO ANE SUBA LUMRAH
LIU ANAKE SEBET
DWANING TAN SIDA PANGGIH
SUBA NISKALA
SANG HYANG ATMA MANYINGID
19.DIMATINE DITU ANGGA KASARE URIPA
DUGAS HIDUP SUJATINNYA MATI
ENTO LIU NAK SING NAWANG
ANE MADANRWA BHINEDA
MARA BISA NYAMBAT JATI
BAPA MANYIHNAYANG
NICEN HIDUP NICEN MATI ??
PUPUH SEMARANDANA
20.DUGASE HIDUP JATINNYA MATI
MAKA BUKTI, MATANE DADUA
BOLONG CUNGUH MASIH PATEH
TANGAN COKORE MASIH TETEP
TUSING TAEN YA MAWUWUH
SANGKAL MATI YA BAWOSANG
21.NE MAURIP WANTAH GETIH
STATA MINDER JERONING ANGGA
YANING GETIHE YE NONGOS
PASTI SUNGKAN TERUS SEDA
DISEDANE GETIHE PEJAH
ANGGASRIRA NE HIDUP
SANGKAL STATA YA MAOBAH
PUPUH GINADA BASUR
22.MAKA CIRI KAURIPAN
ANE MADAN HIDUP JATI
STATA MOBAH TAN RERENAN
SAHA SIDA STATA TUMBUH
DWANING SUBA KASINAHANG
SARWA PRANI
YANING HIDUP PASTI PEJAH
23.SAKING ANGGANE PEJAH
SIDA MALIH PACANG URIP
NANGING BINA PENADOSNYA
MRUPA DWI PREMANA IKU
MEDAL ULED SAKING SAWA
MAKA BUKTI
USAN PEJAH MURIP MUAH
24. UDUH CENING JANI LANTURANG
PEJALAN PEJAH LIU GATI
MADULURAN SWAKARMA
KARMA PALA YA KAWUWUS
SANGKAL TUSING DADI LEMPAS
MALU DURI
MAKEJANG PASTI NEMAUANG
PUPUH PUCUNG
25. ADA
ULIAN TUSING NGAJENG BUBUH
MIWAH KASENGSARAN
KWANGAN MERTA KEWASTANIN
TRUS LUMAKU
PANYUJURE WANTA TUNGGAL
26.ANE MALU
SING NYIDAYANG NAHANANG
SAKIT HATINE NGUNGKULIN
STATA INGUH
27.ULIAN LACUR
DAGANG JAJA GIPANG
APAN MONTORNYANE SING MERIM
JEG NYERUNUK
ANGGON JALAN YA PEJAH
28. ENU LIU
MEMENE JENGAH ERANG
STATA SING NGELAH PIPIS
PANG SING NGUGUL
PIANAKE JEG KESIAM
PUPUH SINOM
29. ADA
PUNYAH ARTA , PUNYAH MUNYI
PUNYAH ULIAN KAWISESAN
PUNYAH ULIAN MRASA RIRIH
MASIH ADA MATI KAREBUT
ADA
TUSING TAU TEKEN MASALAH
ULIAN SOPIR ANE PUNYAH
30. LUGRA RATU NABEN TITIANG
SAPUNAPI IPUN RARIS
YANING KENTEN PEMARGINNYA
DURUS RATU NGANDIKAIN
PRANDA GEDE RARIS NYAWIS
KENI CENING APANG WERUH
PATUT ATAM NE KASUDHA
RIKALANING NGABEN YUKTI
NE KAWUWUS
SUDA MALA BIMA SWARGA
31.YANING KONDEN YA KASUDA
ATMANNYANE NGODA SAI
SIDA NGARDI KABREBEHAN
SAJERONING NYAMA WARGI
LIU SUBA NE NGRASANIN
BAPA PEPES NGICEN BAYUH
SANGKAL SOLEH PANGGODANE
SERET AMRETANE PANGGIH
STATA INGUH
KOOS BOROS RING KORIPAN
PUPUH GINANTI
32.RATU NABE MRAGA WIKU
JANTEN WIKAN MAKA SAMI
WENTEN MALIH LUNGSUR TITIANG
INDIK ATMA RIWUS MATI
SAPUNAPI PEMARGINNYA
MANGDA TITIANG SIDA UNING
33.JANI MELAH CENING NGRUNGU
BAOS BAPA PANG URATI
INDIK ATMA KLANING LEPAS
SUJATINNYA ENU DINI
SEKONDENE KAENTASANG
ANTUK TIRTA PENGENTAS YUKTI
34YANING SIDA CENING MANGGUH
ATMA SIDA MANGGIH CENING
KAWAL ALANGAH NE NYIDAYANG
JANI BAPA MIDARTAIN
LEDANG IDA KALA LEPAS
DWANING KAKURUNG SAKING NGUNI
35.DULUN SAWANE MALUGGUH
STATA NGEMIT ANGGANE JATI
SANGKAL CENING MRASA JEJEH
KALA NGEBAG SAWA PADIDI
SANGKAL CENING NGARDI SODA
WANTAH ATMA KEATURIN
PUPUH PANGKUR
36,ADA
MAMARIKOSA SELAWASNYANE URIP
MASI BAGIAN KEPANGGUH
KADI RASA TANPA DOSA
MISI SOMBONG ANGKUH, MIWAH SUMBUNG
MASIH KEWE YA MUKTIANG
SIDA BAGIA KANTI MATI
37. ENTO MADAN PURWA KARMA
DUGAS MALU TAEN MELAKSANA BECIK
JANI MUPONIN PIKOLIHE IKU
NANGING TUSING KEPAGEHANG
KARMANE ENE KAPOLIHANG ATMANE DITU
MANUT SWAKARMANE MARING JAGAT
SINAH NRAKA KEPANGGIHIN
38.ADA
NENGRANAYANG SWARGANE KEPANGGIH
ULIAN SENTANA,LAWAN DHARMA SADHU
KETO MASI PANGANUGRAHAN
JANE BAPA MANUTURANG NE MAKETELU
SENTANANE KAPERTAMA
SANGKAL SWARGANE PANGGIH
PUPUH DEMUNG PANJANG
39. DUKE RIIN ANA BRAHMANA LUIH UTAMA
MANDAPHALA PAPASIH IRA
JEMET NGELAR YOGA SEMADI
NYURYA SEWANA STATA PAGEH
NANGING TAN HANA SUNNUNIRA
DWANING IDA NGELAR BRAHMACARI
RIKALANING LEBAR WARNANEN
SIDA NGENTAB KANG SWARGA,
KUNANG WERU HYANG INDRA YAN TAN MASUNU
40 WINALIKAKEN SIRA SAKING INDRA LOKA
APAN TAN HANA SENTANA SAWIJI
TAN WENANG APAN TAN HANA NUNTUN
PUTU YATA MAOTAMI
MURANG MURANG ERANG IRA
MAWALI NGUNGSI WANA DURGAMA
MANYUTI RUPA MANADI PUYUH
NGKANA SIRA NGAMET STRI
TAN ASWE ANA SENTANAN IRA
WEKASAN HANA CATUR SUNUNIRA
RENG SRONCA
41. RIUWUS EMBAS PUTRANIRA KACATUR
KANUGRAHAN SIRA DE HYANG INDRA
UMUNGGUH MARENG MERU KANCANA
MARENG PASCIMA LUNGGUHIRA MERU MAS
42.HANA MUAH SANG JARATKARU
BAPANIRA MANGGUH NRAKA RING KAWAH
DENING TAN HANA PUTUNIRA
MATANGYAN SIRA MANGLEBUR BRAHMACARI
43 RIEMBAS ANAKIRA SANG ASTIKA
JUGA MANGGUH SWARGA WARA BRATA
SANGKANING EMBAS PUTUNIRA
YA TA MAKA BUKTI DENING SENTANA
44.MATANGYAN UTAMA KANG SENTANA
SIDA ANGAWE LELANGIT MANGGUH SWARGA
JUGA MAKA PANEBUSAN LETEH
MAKA PIKENOH GRAHASTA ASHRAMA
PUPUH SEMARANDANA
45. DHARMA SADHU NE UTAMI
MASIH SIDA MANGGUH SWARGA
MAKADI SANG DARMA SUTHA
PUTRAN PANDHU RING ASTINA
SATYA PISAN NGELAR DHARMA
SANGKAL SWARGANE PANGGUH
MARING SEKALA LAN NISKALA
46.JANE TUTUGANG NE PING TRI
SWARGA SANGKAN PANUGRAHAN
MEKADINYA I LUBDAKA,
SANGKANING SANG HYANG SIWA
MANGIRINGANG YOGAN IDA
PURWANI TILEM KAPITU
KETO INDIKE NE PIDAN
47 RATU PRANDE NABE LUIH
NAPI SUJATINNYA MUTUSANG
SWARGA NRAKA KEPANGGUHANG
KANTUN BIMBANG TITIANG NUNAS
MUNGGUH MARING NITISATRA
MANUT SWAKARMA ALA
DURUS RATU MIDARTAYANG.
PUPUH GINADA DASAR.
48. YAMA LOKANE WARNANEN
GENAH ATMA TURIKSA DINI
OLIH IDA HYANG SURATMA
MANYINAYANG ALA
MAMUTUSANG POLIH GENAH
WANTA KALIH
SUWARGA MIWAH NERAKA
49.WENTEN ATMA LANANG DATENG
HYANG SURATMA MENAKENIN
MAPA KERANANTA PEJAH
MAPA GAWENTA RI DANGU
LAH MATUR KITA RI NGONG
SATORASI
TATAN WENANG REKAYASA
50.LUGRA RATU HYANG SURATMA
PEJAH TITIANG NENTEN SISIP
SAGET DAPET SAMPUN PEJAH
MANUT DOKTER SRANGAN JANTUNG
DURUS RATU ICEN GENAH
GENAH BECIK
MANGDA JANGKEP KOLAM RENANG
51 UDUH CAI ATMA MREKAK
MERKAK NAGIH TONGOS LUIH
NGONG KONDEN SIDA PERCAYA
UNDUK CAI DUGAS HIDUP
KUKUN BATISE MANGUCAP
MAKA SAKSI
MENGATURANG SEPATUTNYA
PUPU GINADA EMANEMAN
51. SINGGIH RATU SANG SURATMA
IWANG PISAN ATMANNE NIKI
PEJAH IPUN SANE LINTANG
LINTANG DOSIS SABU SABU
NGUMBAR JINAH MASYARAKAT
MANGULURIN
INDRIA TANPEGATAN
52. SADURUNGE PEMILIHAN
AKEH IPUN NGUMBAR JANJI
SESAMPUNE POLIH GENAH
NENTEN RARIS RUNGU RUNGU
MASYARAKAT GEDEG PISAN
KEPANCINGIN
SABU SABU , MIWAH CEWEK
53.SENENG PISAN NGERASAYANG
DWANING TUMBEN MRASA SUGIH
MERKAK CEKAK MALIH SOMBONG
MENGANDELANG TUKANG PUKUL
ULING NYOBA TRUS MENGEDAR
BUDUH PALING
NGENSAP DADI WAKIL RAKYAT
54.YENING KETO GEDE DOSA
DITU LAKU , RORAS WARSI
LIDAH CAI KAL MEPOTONG
PANGSING BUIN NGULUK NGULUK
MIWAH NYUANG PIPIS RAKYAT
JA NI MABUKTI
RASAYANG KARMAN IDEWA.
PUPUH PUCUNG
55SAGET RAUH
ATMA WADON TUR MANGUNTUL
CARA ANAK ELEK
INGET TEKEN DUGAS URIP
STATA NGRAYU
SEKANCANE LANANG LANANG
56ATMA ELUH
MATUR NYAI APANG JUJUR
YANING BANI BOBAB
DANDAN NYAI KAWEWEHIN
RARIS MATUR
NUNAS LUGRA HYANG SURATMA
57. DUKE DUMUN
TITIANG NAPET SAMPUN LAMPUS
NENTEN ELING RING RAGA
SAGET SAMPUN RING RUMAH SAKIT
SAPUNIKU
PEJAH TITIANG TANWENTEN IWANG
58.NGONG SING NGUGU
SEKONDEN KUKUNE MATUR
NGONG BUIN NETESANG
KENKEN SUJATINYA MATI
APANG PATUT
KUKU JRIJINE NGATURANG
PUPUH GINANTI.
59,AMPURAYANG TITIANG RATU
MANGINDIKANG ATMANE NIKI
DUMUN IPUN SENENG NGLEAK
MENYAKITIN ANAK ALIT
TUNGGIL KLIWON NYUJUR SETRA
STATA NGELAR AJI WEGIG
60.YANING KETO SAJA TUHU
KAL MAINCUK ATMAN NYAI
MEBADINGANG, MATUNGGINGANG
APANG NGRASA TEKEN PELIH
NGEMANESIN KENEH TIMPAL
CAI MEBORBOR AJI API
61.MREROD WENTEN ATMA RAUH
LANANG , ISTRI WERDA ALIT
MINAB ATMA NGABEN ROMBONGAN
NEGAK DINI SAMBILANG NGANTI
KETAKENIN OLIH HYANG YAMA
KENKEN PEJALANE MATI
62.WENTEN MATUR MRASA JUJUR
MALIH WENTEN NGAWI NGAWI
TALER WENTEN NGAPAK APAK
MASIH WENTEN PEJABAT TINGGI
PENGULUNG, ,DOKTER. PRESIDEN
SAMI RIMRIM INGET KEN JANJI
RENG SWANDEWI
63.AKSAMA NABE LUGRAYANG TITIANG MATUR
MAPA YAN HANA ATAMA WUS MADWIJATI
APA STATA BENER,MAPA JUGA SIDA IWANG
LA WARNANEN NGULUN, LAMAKANE WERUH
64.UDUH SISIANGKU, MANGKE BAPA MAWARAH
YADIASTUN PRANDA, RESI, MANGGALA NEGARA
HAKIM JAKSA, POLISI MIWAH SERDADU
APAN YA MANUSA JUGA,AMBEKNIA NYIHNAYANG
65.ALA GINAWE , ALA
YAN AYU GAWENIA, BYKATA RAHAYU PANGGIHA
KUNANG YAN YUKTI, SALAH DANDANIA MAWEWEH
ASUBA LAWAN SUBA KARMANE NGARAN
66 HANA BHISAMANGKU MANGKE RI HYANG ATMA
AYWA KITA LIPIA, MANGUNCARANG OMKARA
YAN HANA PANGGUH, TEJA PUTIH RI AWAN
MANJING TA KITA, MATEMAHAN MANGGUH SWARGA.
WAKIA,
YADIASTUN MAPA KAPANGGUH ANENG AWAN,AYWA KITA AJERIH,APAN SAMUA SAHANANENG KAPANGGUH YA JUGA AWAKTA TAN HANA WANEH..
MAKADI HANA WUAYA YA MAKA PANADIAN ARI ARINTA RINGUNI,
MUAH HANA RAKSASI SIRSA YA TA PANADIAN
TEJA BAGAN HYANG IBUNTA RINGUNI,
MACAN ABANG AGALK AMBEKNIRA GETIH TA RINGUNI, MUAH HANA ASU GAPLONG MARUHUR
GUNG TAN PTANDINGAN…YA TA YEH NYOM TA RINGUNI.
ANGKENI SIRA SANAKTA KABEH LAMAKANE TATAN MAMIGNA SIDA KITA LUMAMPAH RAHAYU…..LUNAS LANUS MARING AWAN,
RIKALA NGKANA HANA TEJA PUTIH ANGLAYANG, MANJING KITA….HANENG JRONING TEJA BYAKTA SORGA KAPANGGUH DENTA.
MANGKANA PANGELINGKU RIKITA ATMA.
Katur ring semeton paguyuban crucuk punyah
Kala wenten pelebon ring Karang asem, puri pakuudan karangasem, maret 2013
