DEWI KRESNA MAYA WIWITAN WENTEN DEWAN MLANTING

OM  Swastiastu,

Inggih para diaksa, para panjuriksa, miwah para jana sane oeng ring satwa Bali, sane mangkin titiang jaga ngaturang satwa Bali sane mamurda: Dewi Maya Kresna.

Sadurung titiang ngaturang carita puniki , lugrayang titiang jaga nunas  ampura, ngaksama ring para dewata sami mangda nenten keni cakra pinulah miwah upadrawa.

Om kswamam swamam mahadewa sarwa prani hitankaranh mamoca sarwa papebyah palaya swa sada siwa.

Aturang caritane  irika ring Siwa Loka,batara siwa mapikayun jaga malila cita ring bumi pada, kairingang olih  patnin idane dewi Uma.

Risampun doh pemargin ida, rawuh raris  ri ruhuring samudra jimbar, tan pariwangde jeg  ngeliput rasa smara Ida hyang Siwa saha  seneng ring rabine, aratu kantos medal pretan ida tur tiba ring pupun hyang Uma dewi.Irika raris  keambil pretan ida Hyang Siwa tur keaksi antuk  soca kiwan ida Hyang Uma, kadulurin antuk  mantrotama.Tan aswe medal raris anak alit  mewarna selem, sakewanten jegeg pisan.

Irika raris keparabin Dewi Maya Kresna.

Sayan swe sayan duur anake alit, tur sayan jegeg, tanptandingan.mawinan sami kadi nadak raris:

Hyang Brahma  mecatur muka, mangda dangan ngaksi, sang Hyang Indra dados pengaksian siu, mawinan keparabin Sahasra Ketu,irika raris Maya kresna  kagentosin parab  Dewi Laksmi, maka dewan jegeg jagat.Sami para Dewatane buduh paling.

Irika  sang hyang Siwa mapikayun jaga nyangkepang putrin idane sareng Dewa Jyotisentana, putran Hyang iswara.raris sampun mangkin merabian.

Yan amonapi swen idane merabian, sangkaning tan sida manyenengin, raris sang Jyotisentana,kasedayang antuk kawisesan idane.

Malih mangkin  ngambil rabi  ida sang Prabhu Srutasena,taler nenten langgeng , dwaning ten sida ngenakin kayun. Taler kasedayang sang Srutasena.

Yan wilangin minab sampun sasur swamin ida seda sangkaning durung sida ngicenin sane kearsayang,

Irika dewi Laksmi  manitah Gendarwa raja mangda ngaturang putrane makakalih, sane mawasta : Bajradaksa lawan Bajra angkara.Punika raris keanggen rabi maka kalih sepisanan.

Uning raris Hyang Siwa ring ambek putrin idane, ngambil rabi lanang meraga gendarwa kekalih apisanan, sampun ngugag awig awig swah loka, bendu raris ida tur ngetelang wecana:

Cening dewi laksmi, dadi sing pesan idewa ngajinin aji maka dewaning dewata, guruning guru,

Dong contoh idewane nyingsal teken uger uger.

Sing pantes idewa Nongos di swah loka,apan suba lumrah di swah loka gnah suci nirmala, jani kene cening waluya ngeletehin swargane !!!!!

Jatsmat kita manadi KALIKA!!!!

Muah Ikang gendarwa kalih mandi BUTA BANG  lawan BUTA IJO !!!!

Sangkaning kasidian sapan ida Hyang Siwa, yukti raris aeng rupanida laksmai dewi, sapunika taler gendarwa kalih.nangis mengaksama ida Laksmi dewi tur matur ring ajine……

Aji, ampurayang titiang aji, urungang pastun ajine,

Lek jengah  titiang merupa kadi puniki aji ????

Cening kalika, sing dadi Aji linyok, apan suba mraga Dewa,apa buin idewa maka conto di swarga loka, pang sing lek aji, di bumi pada bapak presiden adil niwakang danda, masak Aji Hyang siwa sing adil ???

Cutet kema idewa ke setra ganda mayu di bumi pada,ditu dewa ngelarang yoga,yan suba tutug wanengan idewa mewali  dadi laksmi dewi muah.

Irika raris  pada pamitan  saking hyang Siwa,

Maka tiga nyujur Setra Ganda mayu ring bumi pada.

Yan amonapi swen ida ngelarang tapa yoga, raris aeng pisan penadosan Kalika.raris polih panganugrahan Hyang rudra  keparabin DURGA BUCARI  sapunika taler Buta BANG  dados Buta Bucari      buta ijo dados KALA BUCARI.

SAHA KAICEN PANGANUGRAHAN BHISMA :

UDUH NANAK DURGA BUCARI BUTA BUCARI MUAH KALA BUCARI,YAN HANA MANUSA MANGELARAKEN IKANG CARU, PANCA KELUD,RIKALA NGKANA KITA INUNTAB DENING SIRA PINANDITA, MUAH KASOMYA KITA, MWALI KITA MANADI LAKSMI DEWI.

KUNANG AWAY KITA MWALI MARENG SWARGA, WENANG KITA ALUNGGUH HANENG MELANTING, SINEMBAH DENING  SARWA DAGANG.

YAN MARENG SANGGAH SANGGAH ALUNGGUH KITA ANENG LIMAS  SARI  LAMAS CATU, WENANG MAWEH   KELANDUHAN IKANG RAT.  MANGKANA BHISAMAN IRA HYANG RUDRA.

Inggih  piknoh miwah suksman carita puniki, kantos mangkin mawinan satunggil wenten  ngelarang caru, stata raris kauntab ida DURGA BUCARI, BUA BUCARI, KALA BUCARI.

Tur kasomya  manut gnah muah lungguh.

Taler ida hyang laksmi dewi dwaning sida angewetuang tresna asih, ida sane kelinggihang ring melanting maka dewan Dagang.

Inggih kadi sapunika sida katur satwan titiang dumugi  wenten pikenohnyane

Saluiring aturang titiang wau, yan pade nenten manut ring adnyana, titiang nunas geng pengampura

Tur sampunang kemad mewarah warah ring sikian ttiang mangda wenten anggen tityang titi pengancan

Wekasan. Om shanti shanti shanti  om.